Svanni – lánatryggingasjóður kvenna býður konum sem reka fyrirtæki áhugavert tækifæri til eflingar. Sjóðurinn styður við fyrirtæki í meirihlutaeigu kvenna með lánatryggingum sem ætlað er að efla uppbyggingu, vöxt og atvinnusköpun. Umsóknarfrestur um lán er til og með 13. apríl.

Áhugasömum um skapandi greinar og nýsköpun er bent á viðburð á vegum Rannsóknaseturs skapandi greina (RSSG), í samstarfi við CCP, sem fram fer miðvikudaginn 8. apríl kl. 10:15–11:45 í húsakynnum CCP í Grósku, Bjargargötu 1 í Reykjavík. Að þessu sinni verður sjónum beint að tölvuleikjagerð sem skapandi grein og þeim fjölbreyttu ferlum sem liggja að baki þróun leikja. Fjallað verður um hvernig skapandi vinna og tæknileg þekking fléttast saman í leikjahönnun, sem og um þau tækifæri og áskoranir sem fylgja starfi innan greinarinnar. Viðburðurinn fer fram á ensku.

Veiðihús rétt við Blönduós óska eftir að ráða starfsfólk til starfa við almenna gisti- og veitingaþjónustu í sumar.

Söfn, setur og sýningar í Húnaþingi vestra munu opna dyr sínar fyrir gestum og gangandi næstkomandi sunnudag, 29. mars, sem er pálmasunnudagur. Opnunartíma má sjá á myndinni. Öll áhugasöm um menningu svæðisins okkar eru hvött til að nýta sér þetta góða boð.

Fimmtudaginn 26. mars 2026 kl. 9:30–11:00 fer fram alþjóðleg vefstofa á Zoom um viðskiptamódel samfélagsdrifinna fyrirtækja í dreifbýli. Vefstofan fer fram á ensku og gæti höfðað til frumkvöðla, stuðningskerfis samfélagsfrumkvöðla, stefnumótenda og annarra sem hafa áhuga á samfélagslegri nýsköpun og þróun í dreifbýli.

Nú á dögunum stóð Eimur fyrir fræðsluferð til Írlands fyrir áhugasama aðila um tækifæri í sniglarækt. Fulltrúi SSNV, Magnús Barðdal, fór með í för til að kynna sér verkefnið og vera í stakk búinn til að styðja við áhugasama aðila með áætlunargerð og þróun verkefna ef vilji er til staðar að hefja slíka starfsemi á Norðurlandi.