Söfn, setur og sýningar í Húnaþingi vestra munu opna dyr sínar fyrir gestum og gangandi næstkomandi sunnudag, 29. mars, sem er pálmasunnudagur. Opnunartíma má sjá á myndinni. Öll áhugasöm um menningu svæðisins okkar eru hvött til að nýta sér þetta góða boð.

Fimmtudaginn 26. mars 2026 kl. 9:30–11:00 fer fram alþjóðleg vefstofa á Zoom um viðskiptamódel samfélagsdrifinna fyrirtækja í dreifbýli. Vefstofan fer fram á ensku og gæti höfðað til frumkvöðla, stuðningskerfis samfélagsfrumkvöðla, stefnumótenda og annarra sem hafa áhuga á samfélagslegri nýsköpun og þróun í dreifbýli.

Nú á dögunum stóð Eimur fyrir fræðsluferð til Írlands fyrir áhugasama aðila um tækifæri í sniglarækt. Fulltrúi SSNV, Magnús Barðdal, fór með í för til að kynna sér verkefnið og vera í stakk búinn til að styðja við áhugasama aðila með áætlunargerð og þróun verkefna ef vilji er til staðar að hefja slíka starfsemi á Norðurlandi.

Mennta- og barnamálaráðherra auglýsir eftir umsóknum frá íslenskum félagasamtökum um styrki til verkefna sem styðja við farsæld barna. Um er að ræða einsskiptisstyrki sem ætlað er að efla innleiðingu laga um samþættingu þjónustu í þágu farsældar barna og menntastefnu til ársins 2030.

Samtök sveitarfélaga á Norðurlandi vestra (SSNV) og Samtök sveitarfélaga á Vesturlandi (SSV) hafa látið vinna samantekt um línustæði raflína, eignarrétt og endurgjald til landeigenda. Markmið skýrslunnar er að varpa ljósi á hvernig bætur fyrir lagningu raflína eru ákvarðaðar hér á landi og bera það saman við fyrirkomulag í nágrannalöndum Íslands.

Hraðið, miðstöð nýsköpunar á Húsavík, stendur fyrir Krubbi dagana 20.–21. mars 2026. Um er að ræða tveggja daga hugmyndasmiðju sem er opin öllum 16 ára og eldri, þar sem unnið er með nýjar hugmyndir, lausnir og skapandi nálganir við raunverulegar áskoranir. Krubbur er ætlaður öllum sem hafa áhuga á nýsköpun, óháð fyrri reynslu, og þátttaka er án endurgjalds. Áhersla er lögð á hugmyndaauðgi, frumkvæði og að efla færni til að þróa og miðla hugmyndum.

Norðansprotinn er nýsköpunarkeppni þar sem leitað er að áhugaverðustu nýsköpunarhugmyndum Norðurlands. Keppnin fer fram dagana 15.-22. apríl og lýkur með úrslitum sem haldin verða í Messanum í Drift EA. Landvættir slhf., fjárfestingasjóður í rekstri Axum verðbréfa hf. veitir verðlaunafé upp á 1.000.000 kr.

Opnað hefur verið fyrir umsóknir í Tónlistarsjóð og er umsóknarfrestur til 15. apríl kl. 15:00. Fyrir þau sem hyggjast sækja um býður Tónlistarmiðstöð jafnframt upp á umsóknarsmiðju þriðjudaginn 7. apríl kl. 15–18, þar sem umsækjendur geta unnið að umsóknum sínum í góðum félagsskap, skipst á hugmyndum og fengið betri innsýn í umsóknarferlið. Veittir eru styrkir í fimm flokkum: tónlistarstyrkir, flytjendastyrkir, viðskiptastyrkir, markaðsstyrkir og ferðastyrkir.

Verkefnið Sunnudagar á safni, sem er hluti af samstarfi safna hjá SSNV, heldur áfram sunnudaginn 15. mars, en þá færist dagskráin í Skagafjörð. Markmið verkefnisins er að efla samstarf safna, setra og sýninga á Norðurlandi vestra og bjóða íbúum og gestum upp á sérstaka menningarupplifun yfir vetrartímann, þegar margir þessara staða eru annars lokaðir.