Orkídea og Eimur kynna spennandi lífgasverkefni fyrir bændum og samtökum þeirra, ráðuneytum, ráðgjöfum, sveitarfélögum og almenningi. Innlendir og erlendir sérfræðingar deila reynslu sinni reynslu af lífgas- og áburðarframleiðslu. Aðgangur að ráðstefnunni er öllum heimill og ókeypis, og verður henni einnig streymt. Skráning er nauðsynleg fyrir þátttöku bæði í raunheimum og streymi.

Jóhann Páll Jóhannsson, umhverfis-, orku- og loftslagsráðherra, hefur gert breytingu á reglugerð nr. 1566/2024 um Loftslags- og orkusjóð og falið sjóðnum að veita garðyrkjubændum sérstakan fjárfestingarstuðning í þágu bættrar orkunýtni og orkusparnaðar. Opnað hefur verið fyrir umsóknir um styrkina á vef Loftslags- og orkusjóðs.

Norðansprotinn er nýsköpunarkeppni þar sem leitað er að áhugaverðustu nýsköpunarhugmyndum Norðurlands. Leitin hefur verið í fullum gangi og bárust 22 umsóknir að þessu sinni. Úr þessum 22 glæsilegu verkefnum hafa verið valin 8 verkefni sem verða kynnt á lokaviðburði Norðansprotans, þar sem dómnefnd mun velja Norðansprotann 2025. Lokaviðburðurinn er haldinn í Drift EA á Akureyri núna á föstudaginn kl.17:00 og er opinn fyrir öll – skráning fer fram hér.

Rannsóknasetur skapandi greina (RSG) hefur umsjón með framkvæmd könnunar um stöðu handverksfólks á Íslandi, fyrir hönd sjálfseignarstofnunarinnar Handverks og hönnunar. Markmið könnunarinnar er að öðlast dýpri skilning á umhverfi handverksfólks á Íslandi og bera kennsl á þá þætti sem þarfnast umbóta með þarfir iðkenda í huga.

19. maí 2025 tók Sara Björk Þorsteinsdóttir, verkefnastjóri farsældarráðs á Norðurlandi vestra hjá SSNV þátt í Sjónaukanum, sem er árleg ráðstefna Heilbrigðis-, viðskipta- og raunvísindasviðs Háskólans á Akureyri. Þema ársins var „Farsæld í íslensku samfélagi“ og voru svæðisbundin farsældarráð á meðal þess sem kynnt var í opnum og fróðlegum erindum.

Föstudaginn 23. maí verður morgunfundur í samstarfi SSNE, SSNV og Norræna Svansmerkisins haldinn í Múlabergi á Hótel KEA. Að auki taka LOFTUM skólinn og Samband íslenskra sveitarfélaga þátt. Umhverfisráðherra opnar fundinn. Þau sem ekki komast á staðinn geta tekið þátt í gegnum Teams.

Miðvikudaginn 14. maí sl. stóð Rannsóknarsetur skapandi greina (RSG) í samstarfi við Rannsóknamiðstöð ferðamála fyrir ráðstefnu í Hofi. Umfjöllunarefni ráðstefnunnar var menningarferðaþjónusta og mótun ferðamálastefnu til ársins 2030. Meðal erinda sem gestir ráðstefnunnar fengu að hlýða á voru fyrirlestrar um Galdrasýningu á Ströndum, Landnámssetrið í Borgarnesi, 1238 á Sauðárkróki, rekstur Hörpu, Bræðsluna og Þórbergssetur auk fræðilegra erinda tengd málefnum ráðstefnunnar.

Föstudaginn 30. maí verður haldin alþjóðleg ráðstefna í Reykjavík, efni hennar snýst um samspil menningar, sköpunar og frumkvöðlastarfs i landsbyggðum í Evrópu.

Sköpunarmiðstöðin á Stöðvarfirði hlaut verðlaunin að þessu sinni og skipar sér þar með í hóp framúrskarandi verkefna sem hlotið hafa verðlaunin á síðustu 20 árum. Una B. Sigurðardóttir, stjórnarmaður og fyrrum framkvæmdastjóri Sköpunarmiðstöðvarinnar tók á móti viðurkenningunni og verðlaunafé að upphæð kr. 2.500.000.

Á Fræðsluhádegi landshlutasamtakanna þann 6. maí stóð SSNV fyrir fræðsluerindinu Viðskiptaáætlun á mannamáli, í fyrirlestraröðinni Forvitnir frumkvöðlar. Þar var farið yfir hvernig hægt er að nálgast gerð viðskiptaáætlunar á einfaldan og aðgengilegan hátt – og hvernig slík áætlun getur orðið öflugt tæki til að segja sögu verkefnisins.