Hinsegin hátíð Skagafjarðar – litrík vika fram undan

Mynd fengin af heimasíðu Skagafjarðar

Hinsegin hátíð Skagafjarðar fer fram dagana 10.–15. ágúst og fram undan er litrík og fjölbreytt vika þar sem gleði, samvera og fjölbreytileiki eru í fyrirrúmi. Hátíðin er stykrt af Sóknaráætlun Norðurlands vestra.

Fjölbreytt dagskrá verður í boði alla vikuna og ættu flest að geta fundið eitthvað við sitt hæfi. Meðal þess sem boðið verður upp á eru regnbogaverslun, fánasmiðja, hinsegin kaffihús, sérstakir regnbogamatseðlar og hamingjustundir, auk fleiri viðburða fyrir ólíka aldurshópa.

Íbúar og fyrirtæki í Skagafirði eru hvött til að taka þátt í hátíðarhöldunum og draga hinseginfánann að húni á flaggstöngum sínum út vikuna, þar til hátíðinni lýkur laugardaginn 15. ágúst.

Við hvetjum íbúa Norðurlands vestra og gesti svæðisins til að kynna sér dagskrána, mæta á viðburði og taka þátt í gleðinni.

Gleðilega hinsegin viku í Skagafirði!

Nánari upplýsingar og dagskrá hátíðarinnar má finna á vef Skagafjarðar.