Nýr viðburður á Norðurlandi vestra: Molduxi Trail

Föstudaginn 8. ágúst 2025 var fyrsta Molduxi Trail haldið á Sauðárkróki – með glæsibrag. Hlaupið fékk styrk úr Sóknaráætlun Norðurlands vestra og var skipulagt af Steinunni Gunnsteinsdóttur, Ægi Gunnsteinssyni, hlaupahópnum 550 Rammvilltum og Frjálsíþróttadeild Tindastóls.   

Í boði voru tvær vegalengdir: 20 km og 12 km. Lengri leiðin var ræst kl. 17:00 og sú styttri kl. 18:00 frá heimavist Fjölbrautarskóla Norðurlands vestra.  

Leiðirnar lágu upp Sauðárgilið á Sauðárkróki og upp að Molduxa með stórbrotnu útsýni yfir Skagafjörð. 12 km leiðin var með um 527 m hækkun og 20 km leiðin um 1.030 m hækkun. Leiðarlýsingin tók meðal annars yfir Sauðá, Litla‑skóg, Molduxaskarð og niður Skógarhlíð.  

Alls luku 92 keppendur hlaupinu: 31 í 20 km og 61 í 12 km. Tímataka sá um tímamælingar. Þrátt fyrir smá rigningu og þoku heppnaðist viðburðurinn afar vel.  

„Það hefur verið frábært að upplifa þann áhuga og stuðning sem Molduxi Trail hefur fengið, bæði frá heimafólki og gestum. Við sjáum mikla möguleika í að byggja upp viðburð sem sameinar hreyfigleði, náttúruupplifun og samfélagsanda – og vonum að Molduxi Trail verði ómissandi hluti af sumrinu á Norðurlandi vestra um ókomin ár,“ segja skipuleggjendur Molduxa Trail. 

SSNV tekur í sama streng og telur viðburð sem þennan styrkja jákvæða ímynd svæðisins, hvetja til hreyfingar og skapa verðmæti fyrir samfélagið í Skagafirði og á Norðurlandi vestra. 

Reynslan af þessu fyrsta hlaupi sýnir að svæðið býður upp á frábæra viðbót við flóru utanvegahlaupa á Íslandi og standa vonir til að viðburðurinn stækki á komandi árum og festi sig í sessi sem aðdráttarafl hlaupara.  

Við hvetjum fólk til að fylgja Facebook‑síðu Molduxi Trail fyrir myndir, fréttir og upplýsingar um næstu hlaup.