Það er gaman að segja frá því að þessa dagana standa sveitarfélögin á Norðurlandi vestra fyrir alls kyns hreinsunardögum þar sem íbúar og fyrirtæki keppast við að gera fínt í nærumhverfinu.
Í þessari viku verða allar götur í þéttbýli Húnaþings vestra sópaðar og eru íbúar beðnir um að gæta þess að leggja ekki bílum sínum úti á götu til að verkið takist sem best. Forsvarsmönnum fyrirtækja býðst einnig að nýta sópinn.
Þessa vikuna standa yfir sumarhreinsunardagar í Húnabyggð þar sem íbúar eru hvattir til að hreinsa garða sína og nærumhverfi og geta þeir skilað garðaúrgangi án endurgjalds á gámasvæði Húnabyggðar. Íbúar eru hvattir til að ganga vel um á gámasvæðinu svo oftar verði boðið upp á endurgjaldslausa losun.
Á Skagaströnd ætla íbúar að taka saman höndum og tína rusl í bænum sínum fimmtudaginn 8. maí og enda svo daginn saman, fagna góðu verki og grilla pylsur á Hnappstaðatúni kl. 18:00.
Skagfirðingar fagna því að um þessar mundir eru 36 ár frá því að umhverfisdagar voru fyrst haldnir, en í ár standa þeir yfir frá 5.-17. maí. Íbúar, eigendur og starfsfólk fyrirtækja og býla eru hvattir til að tína rusl, snyrta til við lóðir sínar og lönd og á opnum svæðum. Í Skagafirði er boðið upp á gjaldfrjáls skil á úrgangi til að umhverfið verði snyrtilegra og fegurra.
SSNV vill nýta tækifærið og hrósa sveitarfélögum í landshlutanum fyrir þetta framtak og vonar að þessir dagar verði vel nýttir af öllum svo Norðurland vestra verði blómlegt og þrifalegt fyrir okkur öll til að njóta.
Höfðabraut 6, 530 Hvammstanga
Kt. 541292-2419
S. 419 4550