Gott samtal á íbúafundum um samskiptastefnu Norðurlands vestra

Frá íbúafundi á Skagaströnd.

Samtök sveitarfélaga á Norðurlandi vestra (SSNV) vinna þessa dagana að verkefni sem felst í mótun sameiginlegrar samskiptastefnu fyrir landshlutann. Í tengslum við verkefnið voru haldnir íbúafundir í öllum sveitarfélögum Norðurlands vestra í lok ágúst þar sem íbúar og fyrirtæki fengu tækifæri til að taka þátt í að móta stefnuna.

Markmið verkefnisins er að fá íbúa svæðisins til að sammælast um fyrir hvað Norðurland vestra stendur og tryggja að samskipti innan samfélagsins byggist á jákvæðni og bjartsýni. Til að styðja við verkefnið hefur Strategía verið fengin til samstarfs við SSNV. Fyrirtækið leiðir vinnu við greiningu, samráð og mótun stefnunnar í nánu samstarfi við verkefnastjóra og fulltrúa sveitarfélaganna.

Fundirnir voru haldnir í fjórum sveitarfélögum:

• Skagafjörður: 26. ágúst í sal Gránu

• Skagaströnd: 26. ágúst í Félagsheimilinu Fellsborg

• Húnabyggð: 27. ágúst í Félagsheimilinu á Blönduósi

• Hvammstangi: 27. ágúst í Félagsheimilinu á Hvammstanga

Á fundunum skapaðist gott samtal þar sem fram komu fjölbreyttar hugmyndir, þarfir og áherslur íbúa. Nú tekur við vinna við að greina það hráefni sem safnaðist og móta drög að samskiptastefnunni. Í september verður stefnan mótuð með stjórn SSNV og í október fer hún áfram til frekari umræðu með sveitarstjórum svæðisins. Í janúar 2026 er stefnt að kynna stefnuna fyrir íbúum og eiga frekara samtal um innihald hennar, áður en hafist verður handa við innleiðingu.

SSNV þakkar öllum þeim sem mættu á íbúafundina fyrir virkt og gott samtal. Ljóst er að á Norðurlandi vestra eru fjölmörg tækifæri til að byggja upp jákvæð og öflug samskipti sem styrkja svæðið til framtíðar.