Open Rivers Programme, alþjóðlegur styrktarsjóður sem starfar frá Hollandi, hvetur opinbera aðila á Íslandi til að sækja um styrki til verkefna sem miða að því að fjarlægja úreltar, manngerðar hindranir úr ám. Talið er að yfir milljón slíkra hindrana séu í ám Evrópu og um 150.000 þeirra þjóni ekki lengur neinum tilgangi.

Miðvikudaginn 3. desember n.k. boða SSNV og Markaðsstofa Norðurlands til fundar klukkan 15 í efri sal Miðgarðs menningarhúss í Skagafirði. Þar ætlum við að ræða ákallið um aukna virkni ferðaþjónustunnar á Norðurlandi vestra yfir vetrarmánuðina, ekki síst í samhengi við beina flugið á Akureyri.

Þann 20. nóvember stóð SSNV fyrir starfamessu í húsnæði Fjölbrautarskólans Norðurlands vestra (FNV) á Sauðárkróki, en starfamessan er eitt af áhersluverkefnum Sóknaráætlunar landshlutans. Á viðburðinn mættu nemendur úr 9. og 10. bekk allra grunnskóla landshlutans ásamt nemendum FNV og gátu þau kynnt sér fjölbreytt tækifæri í atvinnulífinu á Norðurlandi vestra.

Stjórn SSNV átti gagnlegt samtal með innviðaráðherra um stöðu og framtíð Norðurlands vestra. Á fundinum var farið yfir helstu áskoranir og tækifæri landshlutans í innviðamálum, samgöngum, raforkuöryggi og samfélagsþróun. Stjórnin þakkar ráðherra fyrir góðar móttökur og vinnur nú að næstu skrefum.

Málþing um leiðir til byggðafestu á sauðfjárræktarsvæðum haldið á Dalahóteli

Jóhann Páll Jóhannsson, umhverfis- orku- og loftslagsráðherra, og Hanna Katrín Friðriksson atvinnuvegaráðherra hafa ákveðið að ráðstafa 80 milljónum króna í Loftslags- og orkusjóð til fjárfestinga í tækjakaupum sem stuðla að samdrætti í losun gróðurhúsalofttegunda vegna áburðarnotkunar í landbúnaði. Ráðstöfunin er í samræmi við markmið ríkisstjórnarinnar um eflingu nýsköpunar í landbúnaði og markvissari stuðning við bændur.

Í dag kl. 16–19 verður viðburðurinn „Saman við sitjum og saumum“ haldinn í Félagsheimilinu Blönduósi. Þangað geta þátttakendur komið með gamla uppáhaldsflík og unnið með fatahönnunarnemendum í Listaháskóla Íslands að því að breyta, bæta eða skapa nýja flík úr gömlum. Nemendur Listaháskólans eru í Textílmiðstöðinni þessa vikuna og nýta fjölbreytta aðstöðu miðstöðvarinnar við nám sitt.

Barnamenningarráðstefnan Öll börn með! fór fram á Akranesi 13. nóvember og var afar vel sótt, en um 80 þátttakendur alls staðar að af landinu mættu. Þar á meðal var fjölbreyttur hópur fagfólks; listafólk, menningarfulltrúar, fulltrúar menningarhúsa og safna, auk verkefnastjóra frá landshlutasamtökum.

Verkefnastjóri SSNV, menningarfulltrúar allra landshlutasamtaka og Byggðastofnunar áttu fróðlegan fundardag í Reykjavík miðvikudaginn 12. nóvember. Markmið dagsins var að ræða stöðu menningarmála, styrkja tengslin og leita leiða til að auka sýnileika menningar í landsbyggðunum. Dagurinn hófst á fundi með Loga Einarssyni, menningar-, nýsköpunar- og háskólaráðherra. Aðallega snerist fundurinn um skýrsluna Stefnumótun og hlutverk menningarstofnana sem unnin var vegna aðgerðar B9 í Byggðaáætlun. Í skýrslunni má finna upplýsingar um menningarhús um allt land og er markmiðið að skapa sameiginlegan ramma um starfsemi húsanna og styrkja rekstrargrundvöll þeirra til framtíðar.

Þriðjudaginn 18. nóvember verður haldið málþing um leiðir til byggðafestu á sauðfjárræktarsvæðum Dalabyggðar, Stranda og Húnaþings vestra. Málþingið er lokapunktur verkefnis sem Fjórðungssamband Vestfirðinga, Samtök sveitarfélaga á Vesturlandi (SSV) og Samtök sveitarfélaga á Norðurlandi Vestra (SSNV) hafa unnið að á undanförnum misserum.