MARKMIÐ OG HLUTVERK

1.1

Samtökin nefnast Samtök sveitarfélaga á Norðurlandi vestra, skammstafað SSNV. Rétt til aðildar eiga öll sveitarfélög á vestanverðu Norðurlandi sem ekki eru aðilar að öðrum landshlutasamtökum sveitarfélaga. Heimili og varnarþing samtakanna er á skrifstofu SSNV á Hvammstanga.

1.2

SSNV er þjónustu- og samstarfsvettvangur sveitarfélaganna á Norðurlandi vestra.

Markmið samtakanna eru:

·               að vinna að hagsmunamálum sveitarfélaga á Norðurlandi vestra

·               að efla samvinnu sveitarfélaga og auka kynningu sveitarstjórnarmanna

·               að vinna að hverjum þeim verkefnum sem aðildarsveitarfélög eða löggjafinn kunna að fela þeim

·               að styrkja stöðu aðildarsveitarfélaganna á landsvísu

·               að stuðla að eflingu atvinnulífs á Norðurlandi vestra

SSNV skal starfa í samvinnu við önnur landshlutasamtök sveitarfélaga, Samband íslenskra sveitarfélaga og aðra aðila eftir því sem hagsmunir bjóða hverju sinni og við verður komið.

UM ÁRSÞING SSNV

2.1

Ársþing SSNV fer með æðsta vald í málefnum samtakanna. Þingið skal halda fyrir lok októbermánaðar ár hvert. Ársþing hverju sinni ákveður næsta þingstað og skulu þing haldin sem víðast á starfssvæðinu.

2.2

Aukaþing skal boða ef þörf krefur að mati stjórnar eða ef a.m.k. tvö aðildarsveitarfélög óska þess. Aukaþing skal boðað skriflega með a.m.k. tveggja vikna fyrirvara og skal fundarefni tilgreint.

2.3

Stjórn SSNV boðar til ársþings með a.m.k. fjögurra vikna fyrirvara og sendir sveitarfélögum og þingfulltrúum skriflega tilkynningu með ákvörðun um þingtíma og þingstað.

2.4

Stjórn SSNV semur dagskrá þingsins. Dagskrá skal send þingfulltrúum eigi síðar en tveimur vikum fyrir ársþing, ásamt ársreikningi og tillögum að fjárhagsáætlun komandi reikningsárs, tillögum að ályktunum og öðrum erindum sem stjórnin leggur fyrir þingið.

2.5

Á ársþingi skulu tekin fyrir þessi mál:

·        skýrsla stjórnar og starfsmanna um starfsemi liðins árs

·        ársreikningar ásamt skýrslu endurskoðanda

·        fjárhagsáætlun fyrir komandi ár, þ.m.t. ákvörðun um árgjöld   

·        kosning aðal- og varamanna í stjórn

·        kosning formanns

·        kosning varaformanns

·        kosning skoðunarmanna

·        ákvörðun um fundarstað næsta ársþings

·        önnur mál löglega fram borin

Að öðru leyti er stjórn heimilt að haga þingstörfum á þann veg að þjóni tilgangi þingsins og dagskrárefni sem best, t.d. með því að hafa hluta þingsins í formi vinnufundar, kjósa sérstakar starfsnefndir utan hinna föstu starfsnefnda þingsins, o.s.frv.

2.6

Ársþing er lögmætt ef löglega er til þess boðað og 2/3 kjörinna þingfulltrúa eru mættir.

2.7

Það sveitarfélag eða þau sveitarfélög, sem þingið er haldið hjá, skulu leggja fram húsnæði fyrir þingið og aðra vinnuaðstöðu, samtökunum að kostnaðarlausu.

2.8

Nánar skal kveðið á um starfshætti ársþingsins í þingsköpum þess.

UM KOSNINGAR TIL ÁRSÞINGS SSNV

3.1

Á ársþingi SSNV og aukaþingum eiga sæti fulltrúar sveitarfélaganna, sem hér segir:

Einn fulltrúi fyrir hvert sveitarfélag á starfssvæðinu, auk eins fulltrúa fyrir hverja byrjaða 400 íbúa í sveitarfélaginu.

Miða skal við íbúafjölda sveitarfélags þann 1. desember næstliðins árs.

3.2

Kjörgengir eru aðal- og varamenn í sveitarstjórnum og framkvæmdastjórar sveitarfélaga. Um kosningu fulltrúa fer eftir ákvæðum sveitarstjórnarlaga.

3.3

Sveitarstjórnir skulu tilkynna stjórn nöfn kjörinna þingfulltrúa, aðal- og varamanna, fyrir 1. júlí ár hvert.

3.4

Komi í ljós að hvorki aðalfulltrúi né varafulltrúi geta setið ársþing, er sveitarstjórn heimilt að tilnefna annan fulltrúa til setu á viðkomandi þingi, með sömu réttindum og kjörnir fulltrúar.

3.5

Alþingismenn úr Norðvesturkjördæmi hafa rétt til setu á ársþingi með heimild til að ávarpa þingið.

3.6

Ársþing SSNV er opið til áheyrnar kjörnum fulltrúum í sveitarstjórnum, framkvæmdastjórum og lykilstarfsmönnum sveitarfélaga og starfsmönnum SSNV og tengdra verkefna á Norðurlandi vestra.

Stjórn samtakanna er heimilt að bjóða til þingsins aðilum sem tengjast umfjöllun og starfi samtakanna, með málfrelsi og tillögurétti.

UM KOSNINGAR Á ÁRSÞINGI SSNV

4.1

Stjórn SSNV skal skipuð fimm mönnum og jafnmörgum til vara. Skal hún kosin á ársþingi annað hvert ár. Formaður og varaformaður skulu kosnir sérstaklega á sama þingi. Stjórn skiptir með sér verkum að öðru leyti.

Kjörgengir til stjórnarkjörs eru þeir sem eru kjörgengir til setu á ársþingi. Sá sem kjörinn hefur verið aðalmaður í stjórn þrjú kjörtímabil í röð, þ.e. sex ár, er ekki kjörgengur til stjórnar næstu tvö ár.

Miða skal við að stjórn sé skipuð tveimur fulltrúum úr Skagafjarðarsýslu, tveimur fulltrúum úr Austur-Húnavatnssýslu og einum fulltrúa úr Vestur-Húnavatnssýslu. Varastjórn sé skipuð af starfssvæðinu með sama hætti. Formanns- og varaformannskjöri skal þannig hagað að annað hvert kjörtímabil komi báðir úr Skagafirði. Annað hvert kjörtímabil skal formaður hins vegar vera úr annarri hvorri Húnavatnssýslna og skal varaformaður þá koma úr þeirri sýslu er ekki á formanninn. Skulu þeir síðan skipta á embættum um mitt kjörtímabil, á ársþingi milli kjörþinga, þannig að formennska deilist á sýslurnar eitt ár í senn.

4.2

Ársþing SSNV kýs tvo skoðunarmenn reikninga samtakanna og jafn marga til vara.

4.3

Ársþing SSNV kýs fimm manna kjörnefnd, sem jafnframt er kjörbréfanefnd þingsins. Kjörnefnd skal auglýsa í upphafi ársþings eftir ábendingum um kjör til stjórnar, skoðunarmanna, svo og annarra trúnaðarstarfa eða vegna setu í nefndum. Hún skal gera tillögur til ársþings um kjör til trúnaðarstarfa, sem tiltekin eru í lögum samtakanna, landslögum og ákveðin eru af ársþingi. Fylgi ábendingu meðmæli fimm þingfulltrúa telst hún sjálfstæð tillaga, sem leggst fram á ársþingi.

4.4

Ef aðalmaður eða varamaður í stjórn eða nefnd fellur frá eða flytur burt úr landshlutanum á kjörtíma sínum, skal á næsta ársþingi kjósa í hans stað fyrir þann tíma sem eftir er af kjörtímanum.

UM STJÓRN SSNV OG FRAMKVÆMDASTJÓRA

5.1

Stjórn SSNV er ásamt framkvæmdastjóra, málsvari samtakanna milli ársþinga. Engu meiriháttar máli má ráða til lykta án atbeina hennar, nema afgreiðsla þess styðjist við samþykktir ársþinga.

5.2

Stjórn SSNV fer með yfirstjórn á rekstri samtakanna og heldur fundi svo oft sem þurfa þykir. Stjórnin undirbýr mál fyrir ársþing og leggur m.a. fram endurskoðaða reikninga samtakanna og gerir tillögu um fjárhagsáætlun næsta reikningsárs. Reikningsár samtakanna er almanaksárið.

5.3

Stjórn SSNV ræður fastráðna starfsmenn samtakanna, markar starfssvið þeirra og gerir við þá ráðningarsamninga, eftir því sem við á.

Stjórn ræður framkvæmdastjóra og gerir við hann skriflegan ráðningarsamning. Starfsmenn samtakanna skulu hafa réttindi og skyldur opinberra starfsmanna, en að öðru leyti fer um starfskjör samkvæmt ákvæðum kjarasamninga og ráðningarsamnings.

Uppsagnarfrestur fastráðinna starfsmanna er þrír mánuðir og miðast uppsögn við mánaðamót, ef ekki er kveðið á um annan uppsagnarfrest samkvæmt kjarasamningi eða í ráðningarsamningi starfsmanns.

5.4

Framkvæmdastjóri veitir skrifstofu samtakanna forstöðu og annast framkvæmd málefna þess eftir því sem stjórn ákveður. Hann hefur á hendi reikningsskil, innheimtu tekna og aðra fjármálastjórn. Framkvæmdastjóri á sæti á ársþingi, á stjórnar- og nefndafundum á vegum samtakanna, með fullu málfrelsi og tillögurétti, en ekki atkvæðisrétti, nema að hann sé kjörinn fulltrúi. Hann skal leggja fram starfsskýrslu á ársþingi.

5.5

Framkvæmdastjóri skal að jafnaði boða stjórnar- og nefndarfundi. Telji formaður stjórnar eða nefndar að óeðlilegur dráttur sé á fundarboðun, getur hann hlutast til um fundarboðun.

UM ÁRGJÖLD OG KOSTNAÐ

6.1

Ársþing ákveður heildarfjárhæð árgjalda sveitarfélaga við afgreiðslu fjárhagsáætlunar fyrir hvert fjárhagsár. Árgjaldafjárhæð skal skipt á milli sveitarfélaga eftir íbúafjölda miðað við 1. desember næstliðins árs.

6.2

Stjórn ákveður gjalddaga árgjalda og getur lagt fram tillögu um þá samhliða tillögu um fjárhagsáætlun. Dráttarvextir skulu greiddir af vangoldnum árgjöldum frá gjalddaga.

6.3

Kostnaður við stjórn samtakanna, fundarhöld, ferðalög stjórnar og annar sameiginlegur kostnaður greiðist úr sameiginlegum sjóði. Hver sveitarstjórn greiðir ferðakostnað eigin fulltrúa á ársþing SSNV.

UM ÚRSÖGN OG SLIT 

7.1

Kjósi sveitarfélag að hætta þátttöku í SSNV skal sveitarstjórn tilkynna það til stjórnar samtakanna eigi síðar en 6 mánuðum áður en nýtt reikningsár hefst og verður úrsögnin virk við upphaf þess reikningsárs. Hið sama gildir vilji sveitarfélag hætta þátttöku í einstökum samstarfsverkefnum, nema reglur eða samningar um þau kveði á um annað. Ábyrgðir á skuldbindingum samtakanna haldast í réttu hlutfalli við þátttökutíma sveitarfélags í samtökunum.

7.2

Samtökin verða ekki lögð niður nema tveir löglega boðaðir fundir samþykki það með 2/3 hlutum atkvæða. Fundirnir skulu haldnir með a.m.k. tveggja mánaða millibili. Tillaga að félagsslitum skal fylgja fundarboði. Áður en seinni fundurinn er haldinn skal afstaða aðildarsveitarfélaga til félagsslitanna liggja fyrir. Til þess að slit á samtökunum nái fram að ganga þurfa 2/3 hlutar sveitarstjórna aðildarsveitarfélaga að staðfesta þau. Að öðru leyti fer um slit á samtökunum skv. ákvæðum sveitarstjórnarlaga.

UM LAGABREYTINGAR OG GILDISTÖKU

8.1

Tillögur til lagabreytinga skulu sendar stjórn samtakanna a.m.k. þremur vikum fyrir ársþings. Tillögur stjórnar til lagabreytinga skulu fylgja dagskrá boðaðs árþings, sbr. grein 2.4.

8.2

Lagabreyting telst samþykkt, ef hún nýtur stuðnings 2/3 hluta atkvæða þingfulltrúa á lögmætum fundi.

8.3

Lögum þessum var breytt á ársþingi SSNV þann 7. mars 2008 og eru svo breytt frá þeim degi.

8.4

Ákvæði til bráðabirgða er falli úr gildi að loknu ársþingi haustið 2008.

Þrátt fyrir ákvæði gr. 2.1. skal halda ársþing árið 2008 í samræmi við ákvæði eldri laga, þ.e. um mánaðamót ágúst september. Þrátt fyrir ákvæði gr. 3.3. skal að sama skapi tilkynna stjórn um kjörna þingfulltrúa og varamenn þeirra fyrir 1. júlí 2008. 

ÞINGSKÖP FYRIR ÁRSÞING SSNV

1. Þingið heitir Ársþing SSNV og er aðalfundur Samtaka sveitarfélaga á Norðurlandi vestra.

2. Um rétt til setu á þinginu fer eftir lögum SSNV.

3. Þingið skal haldið samkvæmt lögum samtakanna, fyrir lok apríl ár hvert, nema á kosningaári, sbr. grein 2.1. í lögum SSNV. Þá er fundarfært er a.m.k. 2/3 þingfulltrúa er mættur. Stjórn semur dagskrá þingsins, heimilt er þingforseta að víkja frá dagskrá.

4. Formaður samtakanna eða annar í umboði hans setur þingið. Hann skal gangast fyrir kjöri þingforseta og varaforseta, tveggja ritara og jafn margra til vara úr hópi þingfulltrúa. Heimilt er að ráða utanþingsmann til skrifarastarfa.

5. Þingforseti stjórnar fundi og sér um að þingstörf fari fram eftir góðri reglu. Sýni fulltrúi ókurteisi, hefur forseti leyfi til að taka af honum orðið og víta framkomu hans. Þingfulltrúum er skylt að hlíta úrskurði forseta, þó má skjóta úrskurði hans til þingsins, ef vafi leikur á skilningi á ákvæðum þingskapa.

6. Í upphafi þings skal kjósa kjörnefnd, sem er kjörbréfanefnd þingsins. Nefndin kannar rétt þingfulltrúa til setu á þinginu og leggur fram skrá um réttkjörna þingfulltrúa til staðfestingar á þinginu.

Kjörnefnd annast framkvæmd kosninga á ársþingi. Hún leggur fram tillögur um kjör til stjórnar, skoðunarmenn og til annarra starfa, sem lög samtakanna mæla fyrir um og þingið felur henni.

Kjörnefnd skal eigi síðar en við upphaf síðari umræðu þingmála á þingi leggja fram tillögur sínar, ásamt tillögum frá þingfulltrúum, sem hafa fengið tilskilin meðmæli.

Komi ekki fram aðrar tillögur en frá kjörnefnd, eru þær sjálfkjörnar. Kosning fulltrúa fer eftir ákvæðum sveitarstjórnarlaga. Verði atkvæði jöfn við skriflegt kjör skal skera úr með hlutkesti.

7. Á þinginu skal kjósa í fastar þingnefndir: Fjárhags- og laganefnd, allsherjarnefnd, auk þingnefnda sem þingið ákveður að starfi á þinginu. Heimilt er að haga svo kjöri í þingnefndir að fulltrúar velji sjálfir þá nefnd sem þeir vilja starfa í. Enginn þingfulltrúi má sitja nema í einni þingnefnd.

8. Fulltrúar skulu tilkynna forseta skriflega þau mál er þeir óska að komi til umræðu. Máli skal vísað til nefndar eftir eðli þess. Rísi ágreiningur um til hverrar nefndar máli skuli vísað sker þingfundur úr.

9. Afl atkvæða ræður úrslitum mála. Séu atkvæði jöfn er mál fallið, en um kosningar ræður hlutkesti. Afgreiðsla máls telst ekki ályktun þingsins nema meira en fjórðungur kjörinna fulltrúa greiði því atkvæði.

10. Þegar forseti vill taka þátt í umræðu víkur hann sæti en varaforseti gegnir þá forsetastörfum.

11. Fulltrúar skulu taka til máls úr ræðustóli. Þó getur forseti leyft stuttar fyrirspurnir frá fulltrúa úr sæti sínu. Fulltrúar skulu beina máli sínu til forseta. Forseti skal sjá um, að fulltrúar taki til máls í réttri röð eftir því sem þeir hafa beðið um orðið. Þó getur hann vikið frá þeirri reglu við framsögumenn, formann samtakanna og framkvæmdastjóra, eða til að fulltrúi geti gert stutta athugasemd eða leiðréttingu. Enginn fulltrúi má í ræðu sinni lesa prentað mál, nema með leyfi forseta.

12. Enginn fulltrúi má taka oftar til máls en tvisvar sinnum við sömu umræðu í hverju máli, en þó skulu flutningsmenn mála, framsögumenn meirihluta og minnihluta nefnda svo og formaður samtakanna og framkvæmdastjóri, hafa rétt til að taka oftar til máls. Forseta er heimilt að takmarka ræðutíma, ef ástæða þykir til.

13. Forseta er skylt að bera undir atkvæði hvort umræðu skuli hætt, ef fimm fulltrúar eða fleiri æskja þess skriflega.

14. Þingsköpum þessum má breyta ef 2/3 mættra þingfulltrúa samþykkja það á lögmætum þingfundi.

Lög og þingsköp SSNV