SSNV mun ráðast í þróun viðburðadagatals fyrir ferðaþjónustuna á starfssvæðinu á næstunni. Hugmyndin er að stofna slíkt dagatal á internetinu þar sem allir ferðaþjónustuaðilar sem áhuga hafa á að setja inn viðburði á sínum vegum hafa aðgang til að viðhalda sínu eigin efni.

Umsjón með verkefninu hefur Stefán Haraldsson atvinnuráðgjafi hjá SSNV: stefan@ssnv.is

Síðasta vetrardag var rannsóknadeild Selaseturs Íslands á Hvammstanga opnuð með pompi og prakt. Við þetta tækifæri voru undirritaðir samstarfssamningar setursins við Veiðimálastofnun og Hólaskóla, en starfsmenn frá báðum stofnunum hafa nú aðsetur í setrinu. Starfsmaður Veiðimálastofnunar er Sandra Magdalena Granquist og mun hún stunda selarannsóknir en starfsmaður Hólaskóla er Per Åke Nilsson sem auk kennslu við skólann mun sinna rannsóknum á sviði náttúrutengdrar ferðaþjónustu.

 Mynd: Sigurður Guðjónsson forstjóri Veiðimálastofnunar, Hrafnhildur Ýr Víglundsdóttir framkvæmdastjóri Selaseturs Íslands og Skúli Skúlason rektor Hólaskóla við undirritun samninga.

Nú liggja fyrir á vef Hagstofu Íslands tölur um búferlaflutninga sem skráðir voru á fyrsta ársfjórðungi ársins 2009. Hagstofan metur búferlaflutninga á grundvelli upplýsinga um breytingar á lögheimili í íbúaskrá þjóðskrár. Búferlaflutningar eru gerðir upp á grundvelli skráningardags í Þjóðskrá en ekki eftir því hvenær flutningur fór fram. Rétt er að hafa í huga að nokkur töf getur orðið á því að útlendingar sem fá dvalarleyfi séu skráðir í íbúaskrá og að sama skapi getur dregist að þeir einstaklingar sem flytjast af landi brott séu felldir úr íbúaskrá. 

Auglýstur hefur verið umsóknarfrestur fyrir umhverfisvæna nýsköpun undir Nýsköpunaráætlun ESB. Fresturinn er til kl. 17:00 að staðartíma í Brussel þann 10. september 2009.

Verkefnin skulu fjalla um nýja tækni, vörur eða framleiðsluaðferðir í atvinnugreinum þar sem umtalsverðir möguleikar eru á betrumbótum, t.d í matar- og drykkjarframleiðslu og byggingariðnaði.

Iðnaðarráðuneytið, Nýsköpunarmiðstöð Íslands og  Norræna Nýsköpunarmiðstöðin - NICe í samvinnu við Norrænu ráðherranefndina efna á vordögum til norræns málþings í Edinborgarhúsinu á Ísafirði þriðjudaginn 28. apríl sem fengið hefur heitið Nordic Tourism.  
Á málþinginu verður áhersla lögð á nýsköpun í ferðaþjónustu, uppbyggingu áfangastaða og viðbrögð ferðaþjónustunnar við efnahagserfiðleikum.